ମୁମ୍ବାଇ ୨୨/୦୪: କ୍ୟାରିଅର୍ରେ ପ୍ରଥମ ଥର ମନାଲିରେ ଫିଲ୍ମ ସୁଟିଂ କରିବାକୁ ଯାଉଥିବାରୁ ଖୁସିରେ ନାଚୁଛନ୍ତି ବଲିଉଡ୍ ନାୟିକା ଭୂମି ପେଡ୍ନେକର । ଅଜୟ ବହଲଙ୍କ ଥ୍ରିଲର୍ ଫିଲ୍ମ ‘ଦ ଲେଡି କିଲର୍’ର ସୁଟିଂ ସେ ମନାଲିରେ ଆରମ୍ଭ କରିବେ । ଏଥିରେ ସେ ଅଭିନେତା ଅର୍ଜୁନ କପୁରଙ୍କ ସହ ସ୍କ୍ରିନ୍ ସେୟାର କରିଛନ୍ତି । ଫିଲ୍ମଟି ଛୋଟ ସହରର ଜଣେ ପ୍ଲେବଏର କାହାଣୀ ବର୍ଣ୍ଣନା କରିବ । ସେହି ଚରିତ୍ର ନିର୍ବାହ କରିଛନ୍ତି ଅର୍ଜୁନ କପୁର । ଇତିମଧ୍ୟରେ ଜଣେ ସୁନ୍ଦରୀ ପ୍ରେମରେ ସେ ପଡ଼ିଯାଇଛନ୍ତି । ଏହି ଭୂମିକାରେ ଅଭିନୟ କରିଛନ୍ତି ଭୂମି । ଉଭୟ ଏକ ଭଉଁରି ଭିତରେ ରୋମାନ୍ସ କରୁଛନ୍ତି । ସିନେ କ୍ୟାରିଅର୍ରେ ପେସା କିଭଳି ଭାବେ ବିଭିନ୍ନ ସ୍ଥାନ ଭ୍ରମଣର ସୁଯୋଗ ଦେଇଛି, ଭୂମି ସେ ବିଷୟରେ ବର୍ଣ୍ଣନା କରିଛନ୍ତି । ସେ କହନ୍ତି ‘ମୁଁ ବହୁତ ଖୁସି ଯେ ମୋ ପେସା ମୋତେ ଅନେକ ସ୍ଥାନକୁ ନେଉଛି ଏବଂ ସୁନ୍ଦର ଓ ଚମତ୍କାର ସ୍ଥାନର ସୌନ୍ଦର୍ଯ୍ୟ ଓ ସଂସ୍କୃତିରେ ବୁଡ଼ିବାର ସୁଯୋଗ ଦେଉଛି । କ୍ୟାରିଅର୍ରେ ପ୍ରଥମ ଥର ମନାଲିରେ ସୁଟିଂ ପାଇଁ ମୁଁ ଉତ୍ସାହର ସହ ଅପେକ୍ଷା କରିଛି । ଜଣେ ସୃଜନଶୀଳ ବ୍ୟକ୍ତି ଭାବେ ମୋର ଭ୍ରମଣ ମୋତେ ଗଭୀର ଭାବେ ପ୍ରେରିତ କରେ । ‘ଦ ଲେଡି କିଲର୍’ ପ୍ରସ୍ତୁତିରେ ବହୁତ କଠିନ ପରିଶ୍ରମ କରୁଛି । ଏହାର କାହାଣୀ ବାସ୍ତବରେ ଚମତ୍କାର । କେବେ ପରଦାରେ ଦେଖାଇ ନ ଥିବା ମୋ କଳାର ଆଉ ଏକ ଦିଗ ଦେଖାଇବାକୁ ଏହା ମୋତେ ସୁଯୋଗ ଦେଇଛି । ଅର୍ଜୁନଙ୍କ ସହ ମଧ୍ୟ ଏହା ମୋର ପ୍ରଥମ ଫିଲ୍ମ । ଅଜୟଙ୍କର ଏହି କାହାଣୀକୁ ଜୀବନ୍ତ ଫୁଟାଇବା ପାଇଁ ଆମେ କିଭଳି ସୃଜନଶୀଳ ଭାବେ ଏକତ୍ର ହେଉଛୁ, ତାହା ଦେଖିବାକୁ ମୁଁ ବେଶ ଉତ୍ସୁକ ।’
