କାଳବୈଶାଖୀର ତାଣ୍ଡବ,ମହିଳା ମୃତ

କେନ୍ଦୁଝର,୬।୪ କେନ୍ଦୁଝର ଜିଲା ତେଲକୋଇ ବ୍ଲକ ରାଇସୁଆଁ ପଞ୍ଚାୟତ ମାର୍ଦ୍ଦା ଗାଁ ରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି। ଏଥିରେ ଜଣେ ମହିଳାଙ୍କ ଉପରେ ଗଛ ପଡିଯିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି। ମହିଳା ଜଣକ ହେଲେ ମାର୍ଦ୍ଦା ଗାଁ ମାଟିଆ ସାହିର ରସବତୀ ବେହେରା। ତେଲକୋଇ ବ୍ଲକ ରାଇସୁଆଁ ପଞ୍ଚାୟତ ମାର୍ଦ୍ଦା ଗାଁରେ ବୁଧବାର ହଠାତ କାଳବୈଶାଖୀର ପ୍ରଭାବ ଦେଖିବାକୁ ମିଳିଥିଲା। କାଳବୈଶାଖୀ ପ୍ରଭାବରେ ଜୋରରେ ପବନ ହେବା ସହ ବର୍ଷା ହୋଇଥିଲା।  ପ୍ରବଳ ବେଗରେ ପବନ ହେବା ଯୋଗୁ ବହୁ ସ୍ଥାନରେ ଗଛ ଭାଙ୍ଗି ଯାଇଛି। ଗଛ ପଡି ବିଦ୍ୟୁତ ତାର ଛିଣ୍ଡି ଯାଇଥିବାରୁ ବିଦ୍ୟୁତ ସରବରାହରେ ବ୍ୟାହତ ହୋଇଛି। କେତେକ ସ୍ଥାନରେ ବଡ ବଡ ଗଛ ଭାଙ୍ଗି ରାସ୍ତା ଉପରେ ପଡି ରହିଛି। ପବନରେ ଚାଳ ଛପର ଓ ଆଜବେଷ୍ଟସ  ଉଡି ଯାଇଛି। ତେବେ ଗୋଟିଏ ଗଛ  ଉପୁଡି ମାର୍ଦ୍ଦା ଗାଁ ମାଟିଆ ସାହିର ରସବତୀ ବେହେରାଙ୍କ  ଉପରେ ପଡିଥିଲା। ଘଟଣାସ୍ଥଳରେ ରସବତୀଙ୍କ ମୃତ୍ୟୁ ଘଟିଛି।