ନୂଆଦିଲ୍ଲୀ,୨୬।୦୩ : ୧୩ ଘଣ୍ଟା ଭିତରେ ପହଁରି ପହଁରି ଶ୍ରୀଲଙ୍କାରୁ ଭାରତ| ଭାରତୀୟ ନୌସେନାର ଜଣେ ଅଧିକାରୀଙ୍କ ଝିଅ ହେଉଛନ୍ତି ୧୩ ବର୍ଷୀୟ ଜିଆ । ଶ୍ରୀଲଙ୍କାରୁ ପହଁରିବା ଆରମ୍ଭ କରିଥିଲେ, ଆଉ ମାତ୍ର ୧୩ ଘଣ୍ଟା ଭିତରେ ପହଞ୍ଚିଲେ ଭାରତ ମାଟିରେ । ଏଭଳି ଏକ ବିରଳ ରେକର୍ଡ କରିଛନ୍ତି ପାରା-ସ୍ୱିମର ଜିଆ ରାୟ । ଗୋଟିଏ ଦେଶରୁ ଅନ୍ୟ ଦେଶକୁ ପହଁରି ପହଁରି ପହଞ୍ଚିବାରେ ସେ କରିଛନ୍ତି ବିରଳ ରେକର୍ଡ । ଜିଆ ଶ୍ରୀଲଙ୍କାର ପାଲକ ଷ୍ଟ୍ରେଟ୍, ତାଲାଇମନ୍ନରରୁ ପହଁରିବା ଆରମ୍ଭ କରିଥିଲେ । ଆଉ ମାତ୍ର ୧୩ ଘଣ୍ଟା ଭିତରେ ୨୮.୫ କିଲୋମିଟର ଜଳ ପଥ ଅତିକ୍ରମ କରି ପହଞ୍ଚିଥିଲେ ତାମିଲନାଡ଼ୁ ଧନୁଷକୋଡ଼ିର ଆରିଚଲମୁନାଇରେ । ଏହି ବିରଳ ରେକର୍ଡ ହାସଲ କରିବାରେ ଜିଆ ରାୟ ହେଉଛନ୍ତି ବିଶ୍ୱର ସର୍ବକନିଷ୍ଠ ମହିଳା ସନ୍ତରଣକାରୀ । ତେବେ ଜିଆ ଏଭଳି ରେକର୍ଡ କରିବା ପରେ ତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟିଛି । ତାମିଲନାଡ଼ୁ ଡିଜିପି ସି ଶିଳେନ୍ଦ୍ର ବାବୁ ମଧ୍ୟ ତାଙ୍କୁ ଶୁଭେଚ୍ଛା ଜଣାଇଛନ୍ତି । ଏମିତିକି ଭାରତୀୟ ନୌସେନା ପକ୍ଷରୁ ମଧ୍ୟ ତାଙ୍କୁ ଶୁଭେଚ୍ଛ ଦିଆଯାଇଛି ।
