ପୁରୀ,୨୦/୦୨: ଆଜି ବିଶ୍ୱ ବୈଷ୍ଣବ ସମ୍ମିଳନୀ ଉଦ୍ଘାଟନ କରିବେ ରାଷ୍ଟ୍ରପତି । ଶନିବାରଠୁ ବିଶ୍ୱ ବୈଷ୍ଣବ ସମ୍ମିଳନୀ ଆରମ୍ଭ ହୋଇଛି।ବିଶ୍ୱ ବୈଷ୍ଣବ ସମ୍ମିଳନୀର ପ୍ରଥମ ଦିବସରେ ଶନିବାର ଶ୍ରୀଚୈତନ୍ୟ ଗୌଡ଼ୀୟ ମିଶନ ଅନୁଗତମାନେ ଶ୍ରୀକ୍ଷେତ୍ରରେ ନଗର ପରିକ୍ରମା କରିଥିଲେ । ସନ୍ଧ୍ୟା ଅଧିବେଶନର ଅଧିବାସ ସଭାକୁ ଶ୍ରୀମଦ୍ ଭକ୍ତି ବିଚାର ବିଷ୍ଣୁ ମହାରାଜ ସଭାପତିତ୍ୱ କରିଥିଲେ । ବିଶ୍ବ ବୈଷ୍ଣବ ସମ୍ମିଳନୀକୁ ଉଦ୍ଘାଟନ କରିବା ପୂର୍ବରୁ ରାଷ୍ଟ୍ରପତି ଶ୍ରୀଚୈତନ୍ୟ ଗୌଡ଼ୀୟ ମଠକୁ ଯିବେ। ପୂର୍ବାହ୍ଣ ୧୦ଟା ୩୫ରେ ସେଠାରେ ପହଞ୍ଚିବେ। ସେଠାରେ ଥିବା ଚତୁର୍ଦ୍ଧା ମୂର୍ତ୍ତି, ରାଧାକୃଷ୍ଣ ଓ ଶ୍ରୀଚୈତନ୍ୟଙ୍କୁ ଦର୍ଶନ କରିବେ।ସେଠାରୁ ସିଧା ସଳଖ ହେଲିପ୍ୟାଡ୍ ଅଭିମୁଖେ ଦିନ ୧୨ଟା ୧୫ରେ ବାହାରିବେ ରାଷ୍ଟ୍ରପତି । ସେଠାରୁ ୧୨ଟା ୪୫ରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବେ । ସେଠାରୁ ୧୨ଟା ୫୫ରେ ସ୍ୱତନ୍ତ୍ର ବିମାନରେ ବିଶାଖାପାଟଣା ଯିବାର କାର୍ଯ୍ୟକ୍ରମ କରାଯାଇଛି। ରାଷ୍ଟ୍ରପତିଙ୍କ ସୁରକ୍ଷା ପାଇଁ ୪୦ ପ୍ଲାଟୁନ୍ ପୁଲିସ ଫୋର୍ସ ସହ ୨ ଶହ ପୁଲିସ ଅଧିକାରୀ ମୁତୟନ ହୋଇଛନ୍ତି। ସେପଟେ ଗୌଡୀୟ ମଠ ପରିସରରେ ରାଷ୍ଟ୍ରପତିଙ୍କୁ ସ୍ୱାଗତ ପାଇଁ ସମସ୍ତ ବ୍ୟବସ୍ଥା କରାଯାଇଛି ।
