ପୁରୀ,୧୯/୦୨: ଆଜିଠୁ ଜଗତଗୁରୁ ପରମହଂସ ଓଁ ବିଷ୍ଣୁପାଦ ଶ୍ରୀମଦ୍ ଭକ୍ତିସିଦ୍ଧାନ୍ତ ସରସ୍ୱତୀ ଗୋସ୍ୱାମୀ ପ୍ରଭୁପାଦଙ୍କ ୧୫୦ତମ ଆବିର୍ଭାବ ବର୍ଷ ପୂର୍ତ୍ତି ଅବସରରେ ପୁରୀଠାରେ ବିଶ୍ୱ ବୈଷ୍ଣବ ସମ୍ମିଳନୀ ଅନୁଷ୍ଠିତ ହେଉଛି । ଏହା ୨୧ ତାରିଖ ପର୍ଯ୍ୟନ୍ତ ଚାଲିବ । ରାଷ୍ଟ୍ରପତି ରାମନାଥ କୋବିନ୍ଦ ୨୦ ତାରିଖରେ ଏହାକୁ ଉଦ୍ଘାଟନ କରିବେ । ଏହି ଉତ୍ସବରେ ରାଜ୍ୟପାଳ ପ୍ରଫେସର ଗଣେଶୀ ଲାଲ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରମୁଖ ଅତିଥି ଭାବେ ଉଦ୍ବୋଧନ ଦେବାର ସୂଚୀ ରହିଛି । ଏହାବ୍ୟତୀତ ଉଦ୍ଘାଟନୀ ମଞ୍ଚରେ ଶ୍ରୀବ୍ରହ୍ମମାଧ୍ୱ ଗୌଡ଼ୀୟ ସମ୍ପ୍ରଦାୟର ଆଚାର୍ଯ୍ୟଗଣ ମଧ୍ୟ ମଞ୍ଚାସୀନ ରହିବେ । ୨୦ ତାରିଖ ପୂର୍ବାହ୍ଣ ୧୧ଟାରୁ ୧୨ଟା ମଧ୍ୟରେ ରାଷ୍ଟ୍ରପତି ଉଦ୍ଘାଟନୀ ଅଭିଭାଷଣ ଦେବାର କାର୍ଯ୍ୟକ୍ରମ ରହିଛି । ରାଷ୍ଟ୍ରପତିଙ୍କୁ ସ୍ୱାଗତ କରିବାକୁ ବଡ଼ଦାଣ୍ଡସ୍ଥିତ ଶ୍ରୀଚୈତନ୍ୟ ଗୌଡ଼ୀୟ ମଠ ଝଲସିଛି। ଆଜି ରାତିରେ ବଡ଼ଦାଣ୍ଡସ୍ଥିତ ଚୈତନ୍ୟ ଗୌଡ଼ୀୟ ମଠଠାରେ ଅଧିବାସ ସଭା ହେବ।
