ରାଜକନିକା,୧୭ା୩ : ପଂଚାୟତର କୌଣସି କ୍ୟାସ୍ ବୁକ୍ ନଥିଲା କି କାଗଜପତ୍ର ଦେଖାଇପାରିନଥିଲେ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) । ନୂତନ ସରପଂଚଙ୍କୁ ଦାୟିତ୍ୱ ଦେବାକୁ ଆଜି କାଲି କହୁଥିଲେ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) । ଏଭଳି ଘଟଣାରେ ବିଡ଼ିଓଙ୍କ ନିର୍ଦ୍ଦେଶ ପରେ ବୁଧବାର ଅପରାହ୍ଣରେ ସରପଂଚଙ୍କୁ ଦାୟିତ୍ୱ ଦେବାକୁ ଆସି ହଟହଟା ହୋଇଛନ୍ତି ନମତରା ଗ୍ରାମ ପଂଚାୟତର କାର୍ଯ୍ୟନିର୍ବାହୀ ଅଧିକାରୀ(ପିଇଓ) । ପଂଚାୟତବାସୀଙ୍କ ରୋଷର ଶୀକାର ହୋଇଛନ୍ତି ଏହି ସରକାରୀ ବାବୁ । ଠେଲାପେଲା ଗାଳିଗୁଲଜ ସହିତ ତାଲା ମାରି ଅଟକ ରଖିବାକୁ ବାଧ୍ୟ ହୋଇଥିଲେ । ଏମିତିକି ଅଧିକାରୀଙ୍କ ଚାରି ଚକିଆ ଗାଡ଼ିର ଚକରୁ ପମ୍ପ ଖୋଲିଦେଇଥିଲେ ଉତେକ୍ତ ଲୋକେ । ଶେଷରେ ପୁଲିସ ପହଂଚି ଅଧିକାରୀଙ୍କୁ ମୁକୁଳାଇଥିଲେ । ଏଭଳି ଘଟଣା ଘଟିଛି ରାଜକନିକା ବ୍ଲକ୍ ନମତରା ଗ୍ରାମ ପଂଚାୟତରେ । ନୂତନ ଭାବେ ନିର୍ବାଚିତ ହୋଇଥିବା ମହିଳା ସରପଂଚ କମଳିନୀ ଜେନାଙ୍କୁ ଆଜିକାଲିି କହି ଦାୟିତ୍ୱ ଦେବାକୁ ପଛଘୁଞ୍ଛା ଦେଉଥିଲେ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ (ପିଇଓ) ଅଶୋକ କୁମାର ପ୍ରଧାନ । ଏମିତିକି ଛଅଦିନ ହେବ ଦାୟିତ୍ୱ ଦେବାକୁ ପଂଚାୟତ ଅଧିକାରୀ ସମୟ ଦେଇପାରୁନଥିଲେ । ନୂଆ ଦାୟିତ୍ୱ ନେଇ ପଂଚାୟତର କାର୍ଯ୍ୟ ସଂପାଦନା କରିବାକୁ ସରପଂଚ ଚାହିଁ ବସିଥିବା ବେଳେ ପଂଚାୟତ ଅଧିକାରୀଙ୍କ ଏଭଳି ଘଟଣା ଅଧିକ ସନ୍ଦେହ ସୃଷ୍ଟି କରିଥିଲା । ଗତ ୧୦ ତାରିଖ ଠାରୁ ସରପଂଚ ମାନେ ନିଜ ନିଜ ପଂଚାୟତରେ ଦାୟିତ୍ୱ ନେଉଛନ୍ତି । ବୁଧବାର ଦିନ ୧୦ଟାରେ ସରପଂଚଙ୍କୁ ଦାୟିତ୍ୱ ଦେବାକୁ କହିଥିଲେ ପଂଚାୟତ ଅଧିକାରୀ । ହେଲେ ନୂତନ ସରପଂଚ ପଂଚାୟତ କାର୍ଯ୍ୟାଳୟରେ ଦୀର୍ଘ ସମୟ ଧରି ବସିରହିଥିଲେ ମଧ୍ୟ ପଂଚାୟତ ଅଧିକାରୀ ଆସିନଥିଲେ । ଏହି କାରଣକୁ ନେଇ ସରପଂଚ ରାଜକନିକା ବିଡ଼ିଓଙ୍କୁ ଅବଗତ କରାଇଥିଲେ । ବିଡ଼ିଓଙ୍କ ତାଗିଦା ପରେ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) ଦିନ ୩ଟାରେ ପଂଚାୟତ କାର୍ଯ୍ୟାଳୟରେ ପହଂଚି ଥିଲେ । ପୂର୍ବରୁ ଅପେକ୍ଷା କରିଥିବା ସରପଂଚ ଶ୍ରୀମତୀ ଜେନା ଦାୟିତ୍ୱ ନେବା ସମୟରେ ଆବଶ୍ୟକୀୟ କ୍ୟାସ୍ ବୁକ୍ ଦେଖାଇପାରିନଥିଲେ ପଂଚାୟତ ଅଧିକାରୀ । ଯେଉଁ କାରଣରୁ ଲୋକେ ଉତ୍ତେଜିତ ହୋଇ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ)ଙ୍କୁ ଠେଲାପେଲା କରିଥିଲେ । ପଂଚାୟତ କାର୍ଯ୍ୟାଳୟରେ ଅନେକ ସରକାରୀ ଯୋଜନାର କ୍ୟାସ୍ ବୁକ୍ ନଥିବାର ଜଣାପଡ଼ିଥିଲା । ଏହା ସହିତ ଏହି ପଂଚାୟତରେ ଦୁର୍ନୀତି ହୋଇଥିବାର ଲୋକେ ଅଭିଯୋଗ କରିଥିଲେ । ପଂଚାୟତର ଅନେକ କାଗଜପତ୍ର ନଥିବାରୁ ଲୋକମାନଙ୍କ ଆକ୍ରୋଶର ଶୀକାର ହୋଇଥିଲେ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) । ଏହି କାରଣରୁ ଲୋକମାନେ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ)ଙ୍କୁ ଏକ ଘଂଟା ଧରି ପଂଚାୟତ କାର୍ଯ୍ୟାଳୟରେ ତାଲା ପକାଇ ଅଟକ ରଖିଥିଲେ । ଏହା ପରେ ଉତ୍ତକ୍ତ ଲୋକେ ପଂଚାୟତ ଅଧିକାରୀଙ୍କ କାରର ଚକରୁ ପମ୍ପ ଖୋଲିଦେଇଥିଲେ । ଖବର ପାଇଁ ପୁଲିସ ଘଟଣାସ୍ଥଳରେ ପହଂଚି ପଂଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କୁ ମୁକୁଳାଥିଲେ । ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) ଆଠଦିନ ମଧ୍ୟରେ ପଂଚାୟତର ସମସ୍ତ କାଗଜପତ୍ର ଦେବାକୁ ସର୍ବ ସମ୍ମୁଖରେ ପ୍ରତିଶୃତି ଦେବା ପରେ ପରିସ୍ଥିତି ଶାନ୍ତ ପଡ଼ିଥିଲା । ଏହି ଘଟଣାପରେ ନୂତନ ସରପଂଚ ପଂଚାୟତର ଦାୟିତ୍ୱ ଗ୍ରହଣ କରିଥିଲେ । ଏହି ଘଟଣା ସଂପର୍କରେ ସରପଂଚ ଶ୍ରୀମତୀ ଜେନା କହିଛନ୍ତିଯେ, ପଂଚାୟତର କୌଣସି କାଗଜପତ୍ର ପଂଚାୟତ କାର୍ଯ୍ୟନିର୍ବାହୀ ଅଧିକାରୀ ଦେଇପାରିନଥିବାରୁ ଏଭଳି ଘଟଣା ଘଟିଗଲା । ପ୍ରକାଶଥାଉକି ଶ୍ରୀପ୍ରଧାନ ରାଜକନିକା ବ୍ଲକ୍ ନମତରା ସହିତ ସିହୋପଡ଼ା ଏବଂ ଓଳାଭର ଗ୍ରାମ ପଂଚାୟତର ପଂଚାୟତ କାର୍ଯ୍ୟନିର୍ବାହୀ ଅଧିକାରୀ ଭାବେ କାର୍ଯ୍ୟତୁଲାଉଛନ୍ତି । ଏହି ଘଟଣା ସଂପର୍କରେ ରାଜକନିକା ବିଡ଼ିଓ ରବିନାରାୟଣ ଆଚାର୍ଯ୍ୟଙ୍କୁ ପଚାରିବାରୁ ସେ କହିଛନ୍ତିଯେ, ଏଭଳି ଘଟଣା ସଂପର୍କରେ ମୁଁ କିଛି ଜାଣିନାହିଁ । ସଂପୃକ୍ତ ପଂଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ)ଙ୍କ ବିରୁଦ୍ଧରେ ଭିଜିଲାନ୍ସ ତଦନ୍ତ କରିବାକୁ ସାଧାରଣାରେ ଦାବି ହେଉଛି ।