ଢେଙ୍କାନାଳ, ୧୭/୦୪ : ଢେଙ୍କାନାଳ ସଦର ଥାନା କନ୍ଧପାଳ ଗ୍ରାମରେ ପୋଖରୀ ଖୋଳାକୁ ନେଇ ଗୁଳିମାଡ଼ ହୋଇଛି। ଗୁଳିମାଡ଼ରେ କନ୍ଧପାଳ ଗାଁର ଦଳେଇ ନାୟକଙ୍କ ମୃତ୍ୟୁ ହୋଇଛି। କନ୍ଧପାଳ ଗାଁର ଦୁଇ ପରିବାର ମଧ୍ୟରେ ଜମିଜମା ବିବାଦ ଲାଗିରହିଥିଲା । ଏପିରିକି କିଛି ଦିନ ହେଲା ପରିସ୍ଥିତି ଉତ୍ତେଜନାପୂର୍ଣ୍ଣ ରହିଥିଲା । ଯାହାର ପରିଣତି ଏବେ ଭୟଙ୍କର ହୋଇଛି । କନ୍ଧପାଳ ଗାଁରେ ପୋଖରୀ ଖୋଳା ଚାଲୁଥିବା ବେଳେ ୨ ପରିବାର ମଧ୍ୟରେ ପାଟିତୁଣ୍ଡ ହୋଇଥିଲା । ବିବାଦ ଲାଗିଥିବା ଜମିରେ ପୋଖରୀ ଖୋଳିବାକୁ ନେଇ ଘଟି ଯାଇଛି ଗୁଳିକାଣ୍ଡ । ପୋଖରୀ ଖୋଳିବା ପାଇଁ ଜେସିବି ଅଣାଯିବାରୁ ଗୁଳିକାଣ୍ଡ ଘଟିଥିଲା । ୪-୫ ଭାଇ ମିଶି ଗୁଳିକାଣ୍ଡରେ ସମ୍ପୃକ୍ତ ଥିବା ଜଣାପଡିଛି । ଏହା ସହିତ ଗୁଳିକାଣ୍ଡ ପରେ ସମସ୍ତ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇ ଯାଇଥିବା ଜଣାପଡିଛି । ଘଟଣାସ୍ଥଳରେ ଜଣେ ସମ୍ପର୍କୀୟ ଭାଇଙ୍କ ପ୍ରାଣହାନି ଘଟିବା ପରେ ସମସ୍ତ ଅଭିଯୁକ୍ତ ଫେରାର ଅଛନ୍ତି । ପୋଲିସ ଅପରାଧ ସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । ଉଭୟ ପରିବାର ମଧ୍ୟରେ ପୂର୍ବରୁ ଜମିଜମା ବିବାଦ ଲାଗି ରହିଥିଲା ।
