ଜଗତସିଂହପୁର, ୧୪/୦୪ : ଜଗତସିଂହପୁର ଜିଲ୍ଲା କୁଜଙ୍ଗ ଥାନା ଅଧୀନ ଅଗପାଳ ପଞ୍ଚାୟତରେ ମହାନଦୀରେ ଗାଧୋଉଥିବା ବେଳେ ପାଣିରେ ବୁଡ଼ି ଦୁଇ ଜଣଙ୍କ ମୃତ୍ୟୁ ହୋଇଛି । ଗୁରୁବାର ସକାଳ ୯ଟା ସମୟରେ କୁଜଙ୍ଗ ନିକଟରେ ମହାନଦୀକୁ ଗାଧୋଇବାକୁ ଯାଇ ନିଖୋଜ ହୋଇଯାଇ ଥିଲେ । ପଥୁରିଆ ଗାଁର ଚାରି ଜଣ ଯୁବକ ମହାନଦୀକୁ ଗାଧୋଇବାକୁ ଯାଇଥିଲେ । ହେଲେ ଗଣେଶ୍ୱର ସାହୁ ଓ ରାଜୀବ ଲୋଚନ ସାହୁ ମହାନଦୀରେ ଗାଧୋଉଥିଲେ। ଏହି ସମୟରେ ଚୋରାବାଲିରେ ଦୁଇ ଜଣଙ୍କ ଗୋଡ଼ ଖସି ଯାଇଥିଲା । ଗୋଡ଼ ଖସିଯିବା ଫଳରେ ସେମାନେ ଗଣ୍ଡ ଭିତରକୁ ଭାସି ଯାଇଥିଲେ । ଅନ୍ୟ ଦୁଇଜଣ ନଦୀ ପଠା ସେମାନଙ୍କୁ ବୁଡ଼ି ଯିବା ଦେଖି ଗାଁ ଲୋକଙ୍କୁ ଜଣାଇଥିଲେ । ଗାଁ ଲୋକେ ଓ ଅଗ୍ନିଶମ ବାହିନୀ ଆସି ଗଣେଶ ଓ ତାଙ୍କ ଭାଇଙ୍କୁ ଉଦ୍ଧାର କରି କୁଜଙ୍ଗ ମେଡିକାଲରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ବହୁତ ଖୋଜାଖୋଜି ପରେ ଯୁବକ ଦୁଇଜଣଙ୍କ ମୃତଦେହ ନଦୀରୁ ଉଦ୍ଧାର ହୋଇଛି । ଫଳରେ ଗ୍ରାମରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଛି । ମୃତକ ପଥୁରିଆ ଗାଁର ୧୯ ବର୍ଷୀୟ ରାଜୀବ ଲୋଚନ ସାହୁ ଓ ୧୮ ବର୍ଷୀୟ ଗଣେଶ୍ଵର ସାହୁ ।
